Enn eina ferð var tað fótbóltsfelagið B 71 ið bjóðaði motorsúkklum at vera við til sølustevnuna, sum felagið regluliga skipar fyri.

13 súkklur møttu upp at fara umborð á Ternuna, ið fór kl. 13.15. Av tí at Dýri Biðiðdagur var, vóru rættuliga nógv akfør við, so tað var so vítt at vit fingu pláss tann túrin, men við lagaligari hjálp og vegleiðing eydnaðist at fáa súkklurnar út á síðurnar á dekkinum at standa. Tað rullaði so mikið at neyðugt var at standa hjá súkklunum yvirum.

Vit løgdu leiðina beinleiðis til Skarvanesar, har Poul Jákup hevði syrgt fyri at kaffi var gjørt og eisini hevði hann keypt okkum Caramel at njóta saman við. Prátið gekk lystiliga og ikki vantaðu tær vanligu góðu vittigheitirnar frá Poul Jákupi, eins og violinin og klaverið eisini góðu ljóð frá sær hesa løtuna.

Avtalað varð á staðnum, at tann 25. juli verður aftur HD-túrur suður, tá ætlanin er skipa fyri at "lamb í mold" verður borðreitt. Lamb í mold verður stokt í eini jørðholu, sum frammanundan er hitað upp við brennandi báli, har lambskrovið síðani verður sveipað inn í sekkir, fyri síðani at verða grivið undir í mold í uml. 3 tímar at steikja. Meðan steikingin fer fram, er øtlanin at luttakrarnir verða koyrdir til Dals, og síðani verður gingið uppum fjalli aftur til Skarvanesar. Nærri verður fráboðað um henda túrin á www-hdc.fo.

Orsaka av jarðarferð, koma vit til Meginskúlan kl. 15.00, har vit fingu bjóðað at drekka, hvat vit vildu. Smurt breyð og annað gott til góman var eisini at fáa, so tað var bara at njóta av blíðskapinum, meðan súkklurnar vóru stillaðar fram úti í skúlagarðinum.

Um veðrið er at siga, at tað kundi verið betur, so vit máttu tola bæði vind og regn. Væl gekk kortini, og ferðin heim gekk væl eisini. Ein góður dagur endaði nirði á Hvonn í Havn, har fingu eina løtu saman áðrenn hvør fór til sín. Myndirnar tala fyri seg.

Victor

Sunnudagin, tann 19. apríl, varð skipað fyri MC-túri til skipið "Logos Hope" ið lá við bryggju í Havn.

Uml. 15 súkklur høvdu funnið vegin til Statoil-støðina í Gundadali, har farið var frá kl. 14.00 efir Oyggjarvegnum til Statoil-støðina í Kollafirði. Vit koyrdu haðani beinleiðis til Kirkjubøar, har vit steðgaðu eina løtu, fyri síðani at koyra beinleiðis til skipið, ið lá við vestaru kai.

Við tað at vitjanin varð fráboðað, komu umboð fyri skipið í land og bjóðaðu okkum umborð, fyrst til ein huganligan kaffimunn, fyri síðani at deila okkum upp í bólkar, ið fingu hvør sín ferðaleiðara at vísa okkum skipið og hvat tað kann nýtast til.

Sera áhugavert var at síggja og uppliva, hvat skipið kann brúkast, ikki bara sum ein prædikustólur, men eisini sum ein útrætt hond til hjálp til menniskju í neyð, bæði tímiligari og andaligari.

Áðrenn farið varð í land, vitjaðu vit caféina og fingu okkum ein drekkamunn. Fleiri nýttu møguleikan at stuðla arbeiðinum fíggjarliga,

Vit takka hjartaliga fyri blíðskapin og ynskja OM, skipi og manning Guds ríku signing frameftir.

Leygardagin 18. apríl varð skipað fyri MC-degi, sum endaði við MC-Gudstænastu í Ebenezer kl. 15.00.

Byrjað varð úti á Velbastaðhálsi kl. 11.30, har limir í RC-felagnum vístu fram flogfør, tyrlur og bilar. Sera hugtakandi at síggja og uppliva. Eisini fingu vit eina holla frágreiðing frá Petur Hermansen, ið er ein av elstu limunum í RC-felagnum, um felagið og søgu tess. Grillin var eisini uppsett og mong nýttu høvið at keypa góðar pylsur og búffar.

Kl. 14.00 varð gjørt klárt til felagskoyring, har vit koyrdu eina rundu runt um Havnina, áðrenn leiðin varð løgd beinleiðis oman í Ebenezer, har sangkórið og Petur H. Jacobsen sungu. Góður felagssangur og frálík tala, ið legði sera stóran dent á MC-lívið við støði í Sálminum, ið tosar um: "Tá eg síggi himmal Tín, verk fingra Tína. Hvat er tá eitt menniskja, at Tú kemur tað i hug?". Sama um vit eru uppi á tindinum ella nirði í dalinum, so síggja vit undurverk Guds alla staðni. Eisini varð biðið fyri okkum, at eingin skaði og óhapp skulu henda.

Eftir gudstænastuna var skipað fyri hugnaligum kaffimunni áðrenn fólkið fór leiðina heim aftur.

Ein stór tøkk skal ljóða til samkomuna í Ebenezer, ið hýsti okkum og fyri eina sera væl fyriskipaða MC-Gudstænastu.

Klikk á myndirnar, so síggjast tær í størri stødd!

Í samband við stevnuna "Faroe Gathering 2008", varð skipað fyri felagstúri, ið byrjaði uppi við Hotel Føroyar, har gestirnir búðu.

Koyrt varð norður eftir oyggj um Statoil-støðina í Kollafirði til Shell-støðina við Streymin, har steðgað varð, áðrenn farið varð norður um Eiðisskarð, beinleiðis til Gjáar. Haðani varð koyrt til Klaksvíkar, har umboð fyri Norðya MC leiddi fylgið til matarhølið hjá Føroya Bjór, har vit fingu salat, kaffi og heimabakaðar køkur. Eftir hetta vóru vit víst runt í søguliga savninum hjá fyritøkuni, og síðani koyrdu vit norður til Kunoyar bygd, har steðgað varð eina løtu, og frálíka veðrið notið. Nógvar myndir vóru sum rímuligt er tiknar, og fingu vit at vita, at um onkur kundi taka eina nøktandi mynd til blaðið "HD Journalen", so var bara at halda á at fotografera. Einasta treytin var at, ein HD-súkkla skuldi vera við á myndini.

Eftir at allar súkklur vóru bunkraðar á Shell-støðini í Klaksvík, var leiðin løgd út á Toftir, runt Agnið, har steðgað varð við vindmyllurnar. Eftir hetta koyrdu vit inn til Runavíkar, har vit fingu okkum kaffi og hvíldu okkum enn eina ferð. Ferðin helt síðani áfram til Saksunar, har vit eisini steðgaðu og m.a. vitjaðu í kirkjuni.

Nú var dagurin farin at halla, og leiðin var løgd beinleiðis vestur til Gásadals. At ímynda sær føroysku náttúruna í sólsetri, ja, hvat kann vera vakrari ein slíkan dag? Eftir stuttan steðg har, var góð máltíð notin á Hotel Vágum og ein troyttur, men væl nøgdur bólkur kundi nú leggja leiðina aftur til Havnar. Myndirnar, ið eru lagdar út, tala fyri seg.

Tað vóru Victor og Stanley, ið umboðaðu klubb okkara á túrinum. Njót myndirnar. Klikk á tær, og tær síggjast í størri stødd.